提款卡，信用卡 冷知識 (下）
咁上回就講到提款卡嘅冷知識，唔知大家睇左未呢？如果未睇，可以去番呢個網頁睇番：
http://slishing.blogspot.com/2017/05/blog-post.html
咁今日最主要講嘅就係信用卡。但係喺講之前，有D關於提款卡嘅資料要補充番！
提款卡補充資料
原來提款機，無錯係講緊部機，除左「銀聯」 亦都有 VISA/Plus同 Mastercard/Cirrus 嘅網絡！
我手頭上有張 wewa 卡（一張由安信出嘅信用卡），就完美示範點樣又無EPS logo／功能，又無「銀聯」功能，只有Visa/Plus logo
咁如果張卡咁好彩又無銀聯，又無銀通，只有VISA/Plus，但又要去人地 D ATM機撳錢，say 去中銀機撳錢，咁就要比手續費 $25
尋日有一樣資料我係講錯左嘅，就係如果你張卡係HSBC／恆生 而且有銀聯logo 去 「銀聯」果度撳錢，手續費唔係比＄20，而係比$15。
P.S : 有樣野尋日講得唔太清楚，就係 其實EPS 撳錢/比錢，佢嘅password 同你去銀行ATM 機撳錢嘅password 係一樣的 😌
信用卡
好啦，講完提款卡，而家講番信用卡先。身為一個大學生，其實大家可能最少都有一張信用卡。咁信用卡老實講都真係有佢嘅好處，交學費賺積分，有D網上交易（如訂機票）需要credit card，去某D地方食野／買野 有某張信用卡會有折扣優惠，仲有好多數不盡嘅好處。咁大家成日聽到Visa, Master, AE卡... 呢D其實係一D發卡嘅組織，佢地多數唔會負責發卡，而係負責搵更多唔同嘅店鋪結盟。而發卡就會「外判」比一D銀行。例如Visa 呢個組織喺香港唔會負責發卡，而係會比唔同嘅金融機構，例如中銀，匯豐，even 安信 發行信用卡
但係大家都有可能遇到以下幾個問題：
1. 點樣申請到信用卡 （學生無收入，洗唔洗年費）
2. 信用卡limit 唔夠大點算好？
3. 點找卡數（如果有 中銀account，但信用卡係恆生）？
4. 咩係 paywave/ apple pay
5. 點用信用卡撳錢（不過筆者極度十分唔建議咁做）
1. 點樣申請到信用卡 （學生無收入，洗唔洗年費）
咁講番第一樣先啦，其實好多信用卡都有學生卡 version，咁通常你只要有學生證，其實都唔洗你交入息證明。咁但係佢比你嘅 credit limit會比較細，通常都係得 $10,000。自己Google 下 "大學生信用卡" 你就會見到有好多銀行都比學生申請信用卡。而學生嘅信用卡有絕大部份都係免年費，有D仲會係終生免年費。老實講，就算你唔係學生，好多信用卡都唔洗年費，就算真係要，你都可以打去card center hotline waive佢（有D仲誇張到喺個電話錄音到有個button 比你簡免年費）。而有D 信用卡可能真係會收你年費，但只要你一年裹面簽夠某個額，佢都會waive你。# 點樣申請信用卡？ 其實喺學校好多時都會有人擺檔，你有興趣又見到就可以申請。如果見唔到有人擺檔，你都可以上佢個網直接網上申請張信用卡。
大學會同某D銀行推出大學聯營卡，咁其實都無咩特別，最多咪又係喺張卡到印間銀行同大學個名。咁筆者都有做過資料搜集嘅：
東亞銀行：KongU PolyU LingU EduU
恆生銀行：CUHK CityU HKBU
中國銀行：HKUST
圖為2015年時申請的信用卡，新版信用卡嘅背景圖案已經唔同左🙈
2. 信用卡limit 唔夠大點算好？
咁第二個問題呢，就係張信用卡credit limit 嘅問題 ，因為個身份係學生，大部份銀行都只係肯批$10,000 credit limit。咁問題嚟啦，張信用卡 $10,000 其實平時都算夠用。但係如果要交學費，幫朋友買機票，炒iPhone 。。。咁$10,00 其實好唔夠。咁可以點做呢？筆者建議幾個方法比大家：
(a) 申請多張信用卡
(b) 預先入定錢落張信用卡
(c) 打比card center 要求臨時增加額度
(d) 去銀行交入息/ 銀行存款證明，增加信用額度
咁講番(a) 先啦，申請多張信用卡，呢個好似好廢話，但係其實你諗下，如果你有兩張信用卡，每張有$10,000 額度，兩張都有20,000。$20,000 可以用嚟交學費，可以炒到2-3部iPhone，平時又可以交替使用。
咁 (b) 呢，呢個都係一個幾common嘅方法。 其實，你平時用左信用卡，你都要還錢，咁你還完錢之後 個credit limit 就會去番 $10,000。咁同樣道理，你可以預先入定錢去你個account，例如本來有 $10,000 credit limit 原封不動，咁之後你入多$20,000 via ATM 機，PPS or counter，咁之後過多兩個工作天左右，你就會有total $30,000 credit limit ($10,000 default and $20,000 你入左嘅)
而(c) 就係打去card center 要求臨時增加額度，同佢講你需要增加嘅原因，（再加多句urgent），咁佢通常一日左右就會同你講得唔得，但呢個方法唔保證成功批到。
咁(d) 呢就係for 你長久D嘅計劃，例如你覺得信用卡額度 $10,000 係長期都唔夠，但又唔想申請多張卡or 下下入錢咁煩，咁你可以考慮去銀行搞個手續，帶埋銀行存款/入息證明，同佢地講你想增加信用額度，佢地就會幫你搞。
3. 點找卡數（如果有銀account，但信用卡係恆生）？
好啦，第3個問題，好多人都好煩嘅一個問題，例如我得中銀account，但係我而家有恆生同渣打信用卡，咁我用左之後要還錢，咁可以點做？咁其實要還錢都唔難嘅，方法都有好多：
- (1) 選擇去番所屬信用卡嘅銀行 counter 排隊還錢
- (2) 去ATM機入錢 (部份存款機只接受以$100 為倍數的紙幣／部份則接受以$20 為倍數的紙幣）
- (3) 直接申請番信用卡發卡銀行嘅銀行戶口
- (4) 自動轉帳 （填份表 畫隻龜，確認你授權銀行建立 直接付款授權服務）（例如 可以中銀銀行戶口 轉帳比 恆生，如果建立左直接付款授權服務）
- (5) 寄支票比銀行
- (6) PPS （繳費靈服務）
咁我地分析下各個還錢方法啦，第1個方法（counter 排隊還錢）應該無咩人會去做。上次比人凍結左個account 諗住去銀行解凍，一排就用左半個鐘，除非你好多時間，如果唔係呢個方法一定唔work
第2個方法呢，去ATM機入錢？ 呢個都係一個可行嘅方法。但係第一，香港地，你估周圍都有存款機咩，有D要去到無雷公咁遠先有。第二，你要喺A銀行撳左錢再去B銀行入錢，真係何其荒謬。
第3個方法仲搞笑，如果我有10 張信用卡，咁我係咪要申請10個銀行account 先還到錢？
第4個方法都係一個好嘅方法，但係，首先，你要確保喺最後還款期果日，自己個戶口一定要夠錢比佢過數，如果唔夠錢，佢會當你無交晒錢，之後你就大獲
第5個方法其實都幾麻煩，要特登去寫張支票，又要貼郵票。。。
所以筆者極力建議第6 個方法 - PPS （繳費靈）
唔知大家有無聽過 or 用過，但如果用過，你一定明我點解咁極力推介呢個功能。
PPS 其實個原理係，首先你要有一張卡，咁係可以提到款嘅 （簡單D嚟講，即係提款卡／具備提款功能之信用卡）
留意：你去PPS 登記果張提款卡將會係之後負責 找信用卡D 數。（係直接過數）
咁之後呢你要去一D設有「繳費靈」終端機 嘅店鋪登記番（多數OK 便利店都會有）
設有「繳費靈」終端機嘅店鋪地址如下：
http://www.ppshk.com/hkt/prt/Web/ch/
登記嘅steps 可以 睇番：
https://www.youtube.com/watch?v=0nfnE6usDIE
咁去到終端機登記完，你就會收到張數據，同你講你嘅 account number
而之後你就可以去番PPS 個網頁到登入番 （留意：你喺終端機登記果時，應該係已經登記埋個 繳費靈網上密碼。）
點樣用PPS 個詳情可以refer to：
http://www.ppshk.com/hkt/revamp2/Chinese/NewToPPSi.html
咁登入左之後，如果新用戶，應該係無任何嘅帳單記錄。咁你呢個時候，就可以登記番你想要找數嘅信用卡。
（其實唔止信用卡，好多其他服務，例如大學交學費，考評局交考試費，電訊商交上網費...）
咁舉個例子，例如你想找恆生信用卡數，又想找渣打同匯豐卡數，咁你撳入去「銀行或信用卡服務」，一次過登記晒3個account，咁之後你就可以以後直接透過PPS 找數。
筆者就登記左4個account ，咁如果用左邊張信用卡就可以直接via 呢到找數
咁只要一喺PPS交左錢，銀行戶口就會直接過數，方便快捷
咁整合番PPS 嘅好處啦
簡單易用 - 只要拎張提款卡去 終端機登記就用得
跨平台 - 就算你得中銀銀行戶口，但你要還恆生、渣打卡數，用PPS 就得
（PPS 其實就係類似一個中介平台）
用途廣泛 - 除左信用卡，其他例如政府、電訊、學校、醫療。。。 你都可以用PPS 交錢
仲有，比較另外果5個還款方法，PPS 只係需要你安坐家中，有部電腦，咁就已經可以找到卡數 （可能只係分幾鐘，已經可以找到卡數）
所以，呢個就係筆者極力推崇PPS 嘅原因啦 😂
4. 咩係 paywave 同 apple pay
如果曾經有做過cashier，相信對於信用卡比錢都應該唔會陌生。但筆者試過買野，發現有D收銀 對於 paywave 可能都未必知係咩。咁其實paywave 呢 其實就係Visa 公司建立嘅一種感應式嘅信用卡付款。咁就唔係張張visa 卡都有paywave 功能。而paywave 嘅好處就係快捷方便。老實講paywave 就好似八達通咁，你張一張附有paywave功能嘅 信用卡放喺paywave 感應器度，大約一至兩秒 就可以完成交易。雖然可能慢過八達通 比錢，但一定快過你插張卡落card reader！咁但係paywave 有個限制，就係你最多只可以比 $1000 樓下嘅交易，超過$1000 可能需要用番原始嘅方法插卡。咁呢個玩法其實都幾正，例如你要去惠康 百佳買野， 咁佢地都接受paywave 比錢，如果你驚 八達通 唔夠錢比，想用信用卡比錢，但又驚阻到後面比錢嘅人，咁Paywave 其實都不失係一個好方法去比錢！
附有paywave 功能嘅visa 卡
咁Apple Pay 呢？講真其實都係一個好方便嘅付款工具，咁首先當然你要有一部iPhone 喺手，個model 最少要係 iPhone 6 or above。咁你首先要入左去wallet 個app度先，然後就輸入番D信用卡資料，信用卡號碼，保安編嗎...
詳情可以睇以下呢個網址：
https://www.youtube.com/watch?v=dhavlAobFD8
咁完一大輪，其實最想講係佢實際嘅操作，因為部iPhone suppose support NFC 功能，咁其實佢同paywave 無咩分別。但Apple pay 可以入嘅信用卡類型唔需要要係 已具備paywave 功能嘅信用卡（即係就算無paywave 功能嘅信用卡都可以入落Apple pay到，並且用 Apple pay比錢）。咁佢support 嘅銀行其實都好多：
而用Apple pay 比錢嘅好處係：
- 方便 ： 預先入定信用卡資料入去，帶部手機比錢就夠，真係信用卡都唔洗帶出街（咁當然前提係 果間鋪頭係support Apple pay 付款先可以咁做啦）
- 安全 ： 每次比錢，都需要你用指紋去做verification，你只需要擺隻手落個touch ID 就已經完成認證，非常安全
- 跨平台： 可以一次過擺最多8張信用卡落Apple pay 度，而且support 好多間銀行嘅信用卡，
5. 點用信用卡撳錢
講緊嘅係點用信用卡喺ATM機 撳錢，其實 呢樣野唔難。每一個人收到信用卡之後，打電話確認收妥信用卡之後3 個工作天左右啦，你就會收到信用卡密碼，咁收到之後，如果想撳錢就可以去番ATM 機撳錢。但筆者絕對絕對絕對唔建議大家咁做。（所以筆者都唔會用信用卡撳錢，而以下所講嘅野，筆者要戴定個頭盔先。因為筆者未試過蝕比信用卡公司，而用信用卡喺ATM 機撳錢而產生嘅費用，筆者都只係喺網上做資料搜集而搵到，唔保證資料嘅對錯嫁 😇）
唔知大家知唔知其實用信用卡撳錢已經係一種現金透支嘅動作。咁首先，你現金透支，已經要手續費，咁手續費呢樣野間間唔同，用中銀做個例子，現金透支，手續費已經係 你撳錢金額嘅3% 再外加 $20 手續費！
唔同銀行嘅透支手續費同現金透支年利率： http://ibciva.com/images/credit_card.pdf
你以為淨係比手續費就夠？少年，你太年輕了，你仲要比埋信用卡利息。咁中銀信用卡當佢每月息率係2.5% ，咁如果你用信用卡透支左 $10,000 ，而你又咁叻仔，喺果個月截數日之前還到錢，咁你要還嘅錢 就包括
本金：$10,000
手續費：$10,000 * 3% + $20 = $320
利息：$10,000 * 2.5% = $250
結帳日（1個內找到數）: $ 10,000+320+250 = $10,570
你以為咁就還晒錢？
「恒生銀行發言人解釋，以信用卡提取任何現金貸款均需繳付利息，且不設免息還款期，利息由貸款日起計算，直至全數清繳所有帳項。由於信用卡截數日起至客戶繳付月結單上結欠期間仍會產生利息，故有關的利息會反映於下一期月結單上。」
當你還左月結單要求你還嘅果 $10,570 之後， 其實果段期間都會產生利息，即係
交完 $10,570 之後， 下一期你仲有 利息 ： $10,570 *2.5% ＝$264.25
呢d 咪真係 利疊利，利疊利，認真和味 lor～
點樣先可以下個月唔洗再交利息？
「發言人強調，有關安排屬市場一貫的計算方法，如客戶曾透支現金，建議繳付月結單結欠時，可先聯絡客戶服務熱線了解當日之總結欠，並於當日清繳有關款項，避免產生新的現金透支利息。」
所以話，信用卡係有好多好處，為大家帶嚟好多方便，但係如果你唔準時還錢 或者 用信用卡撳錢，個後果其實可以好嚴重！
有趣冷知識～
正常嚟講，信用卡嘅封面都會default 左果間銀行嘅圖案，做user 嘅 根本就無say 兼且個個用果張卡都千篇一律，毫無特色。但筆者發現有D銀行好sweet，佢會比你喺信用卡果度自己design 個圖案，upload 上網，之後過多個幾星期，就會收到張credit card 好似咁嘅樣。講真，我真係覺得張信用卡好靚，型到一個點！
其實邊張信用卡好用D，大家可以Google 下，睇下其他人嘅page，我唔想hardsell 咩信用卡，真係想知再inbox 我。事實上，信用卡呢個topic 其實仲有好多野寫，如果大家想知更多我先再寫～
***苦口婆心再講多次，信用卡的確可以為大家帶來好多方便，但要留意準時還款，同埋最好唔好用信用卡撳錢，千其唔好淨係還min pay***
今次寫左4500 幾字，又用左接近5個鐘先寫完 😹 下一篇blog 寫咩好呢，下次再算🙈
謝謝你
回覆刪除你好,想問問如果我星展信用卡credit係1萬,我入多3萬入去
回覆刪除但之後想撳返出嚟,有冇咩方法?(本人冇星展戶口)
可唔可以直接在星展atm拎錢?
不可以 會當信用卡透支
刪除想撳返出嚟只有一個方法 打hotline叫客戶出張票比你
想知信用卡上啲#係咩意思，同持卡人有無關係？有咩要注意？
回覆刪除