身份證～

因為最近返緊intern，所以post 會好不定期咁出🙇
上期講完信用卡同提款卡，有唔少朋友同我講篇blog寫得太長
所以呢次會寫短D

信用卡，提款卡未必個個都有，但今期講嘅身份證，相信每一個香港人都會有😂
有身份證嘅作用係咩呢，驚比警察查身份證？見工用？入境果時用？仲有好多，好多...
但今日就唔同大家講身份證嘅用途，反而想講下身份證入面嘅唔同地方、唔同數字／英文字母代表D咩😇

下面係一張 智能身份證，我喺旁邊加左唔同嘅字母，大家知唔知果一堆雜亂無章嘅數字／英文字母代表D咩呢

取自入境處網頁 - http://www.immd.gov.hk/hkt/services/hkid/smartid.html

比3 秒鐘大家諗下
3
2
1
😉

好啦，開估！

A. 中文電碼
講左 A 先。從上面嘅例子中，有3組4位數字 - 2621 2535 5174
呢三組數字並唔係無意義，佢有個名 - 中文電碼
中文電碼係用嚟表示你嘅名
例如上面身份證主角 "李智能"
咁2621就 代表 "李"，2535就 代表 "智"，5174就 代表 "能"

咁中文電碼相傳係清朝政府喺 1880 年搵左個 丹麥人設計，咁數字由0001到9999 加埋可以表示10,000 個唔同嘅漢字。詳情大家可以自己google  同 可以上以下網站 http://chinesecommercialcode.net/
試下convert 個名同數字

咁有人會問 - 到底呢組數字有咩用，差佬查身份證都唔會用到啦。

其實如果大家有留意，有唔少職位申請表，入學申請表都有中文電碼一欄要你填中文電碼：

咁其實中文電碼喺第一代身份證已經有，當時D政府文員又未必識打中文字/打字慢，咁政府D電腦系統裹面有得輸入中文電碼，咁當時就可以比D唔識打中文字嘅朋友靠入電碼拎到個中文名啦
而家政府都要求文書助理／助理文書主任要識打中文同打得快，而保留呢個電碼嘅原因，好大機會係用嚟核對資料。大家都知小編我寫字有幾核突，如果中文名寫到好樣衰，都仲可以靠電碼核實到個名，嚟番個雙重保險。
PS 大家見到政府申請表上 中文電碼果欄 有6個位，就知其實政府／入境處規定左 香港身份證裹面嘅名係唔可以超過6個字
PS2 其實外國人拎香港身份證有英文名都得，中文名／中文電碼是可以漏空的！
有興趣可以睇下：http://hk.apple.nextmedia.com/supplement/wellbeing/art/20160828/19751834

B. 符號標記
B 果格 其實叫 "符號標記"。咁原來裏面唔同嘅英文字母 同符號係代表唔同嘅意思：

取自入境處網頁 - http://www.immd.gov.hk/hkt/services/hkid/smartid.html

咁筆者（我）果張身份證就係 ***AZ
即係表示：
- 持證人年齡為18歲或以上及有資格申領香港特別行政區回港證
- 持證人擁有香港居留權
- 持證人報稱在香港出生

所以以後唔會再覺得呢埋英文字母符嘅無意義啦！😊

C. 首次登記身份證的月份和年份
簽發日期 （首次登記身份證的月份和年份）
呢個又有咩用呢？
咁老實講，我都唔太知有咩用@@
但大約簡介下，香港嘅小朋友，正常11歲拎兒童身份證
咁例如有個人小朋友2000 年出世，咁正路括嘅裹面應該係2011 年 (2000+11)
但果個人嘅身份證並唔係2011，而係再早D
點解呢？唔通提早左拎身份證？

原來，就算你11歲先拎身份證，但如果你中間有申請過travel document, passport，咁你嘅首次登記身份證日期就由果時計起
即係話例如2000 年出世，但兩歲果時，佢父母已經幫佢搞左passport，咁首次登記日期就會係 2002 年。

同樣地，如果唔係香港出世，喺其他地方嚟香港，咁首次登記日期就會由佢地入香港拎身份證果刻計起

個用處我真無唔多清楚，但可以比你知道你大約最早幾時拎過passport/拎身份證嘅時間

D. 身份證簽發日期
D 呢個係身份證簽發日期，咁個日期其實就係 呢張身份證嘅簽發 日期
咁正路嚟講，例如你1996年出世，應該而家拎緊果張嘅簽發日期（年份）係2014

呢個位嘅用處，無記錯我只用過一次，就係申請 特區護照 果時，佢叫我填寫身份證簽發日期，可能係為左比入境處同事核實資料／方便佢地喺電腦拎番D資料掛 @@

E. 身份證號碼第一個英文字母
大家估唔估到原來身份證第一個字母都有特別嘅意思呢@@

取自： https://zh.wikipedia.org/wiki/%E9%A6%99%E6%B8%AF%E8%BA%AB%E4%BB%BD%E8%AD%89#.E8.B5.B7.E9.A6.96.E5.AD.97.E6.AF.8D

咁以上嘅資料就睇到 原來1983年之前， A、D、H 字母開頭嘅 身份證持有人係喺港島辦事處拎身份證，而字母開頭B、E、G 就係九龍，新界就係C
咁去到1980年代開始，就統一番，即使唔同地方搞身份證，都用番所屬字母，例如1988年開始嘅我， "Y"世代！

有件有趣嘅事就係，其實雖然統一左身份證嘅英文字母，但身份證頭3位數字其實都有用處
以我為例，身份證頭3個字係 Y56。我就6月出世嘅，但有朋友係同年11月出世，點知身份證號碼係Y54 ...

咁經過我明查暗訪😹，比我發現左，原來當年港島區嘅朋友用緊嘅number 係Y53 同Y54
而九龍區出生登記處 可能接受比較多人申請，用緊嘅數字由Y55 去到 Y58 都有@@
（單係Y56 開頭，由4月頭用到8月中 ，用左5 個月時間就用完）
港島區就相對較少，即使你2月開始到12月，都仲係用緊 Y53 同 Y54 呢兩組number ...


***** 要澄清番係，講緊唔係你當時住邊，而係去邊個人事登記事處登記。如果你出世嘅醫院喺九龍，咁正常都會去番九龍出生登記處做登記。但係，原來如果荃灣出世嘅人，都會用番九龍登記處 而唔係用新界果個@@，所以，其實都係跟番邊一區做身份證登記而訂！


F. 檢查數位
F 係 Check digit (檢查數位 )，咁其實括號裹面可以係 數字或者英文字母（如果係英文字母，只會係"A"）
咁檢查數位並唔係身份證號碼嘅一部份，之所以有呢樣野有幾個原因：
第一，當年（70,80 年代）有好多II （illegal immigrants)，有D犯罪集團想偽做身份證，所以入境處整左呢個加密法 - 就算你作到頭6個數字，最後括號裹面嘅數字／英文字母都未必撞得岩！ 咁當然，去到千僖年果時，有個人破解左呢嚿野，所以要隨機gen 個身份證number 話咁易

咁第二啦，好重要，因為有D人寫字好肉酸，即係我。咁睇果條友未必睇到你寫咩／手快快入錯左，咁透過check digit 就可以alert 佢 - 你入錯身份證號碼了！


有興趣想知點計，可以睇下呢篇文章：
http://www2.hkedcity.net/sch_files/a/lsc/lsc-math/public_html/ID_Card_Secret.pdf



咁題外話啦，第一代智能身份證已經由2003 年起已經有接近15年歷史。正所謂科技一日千里，舊身份證好多防偽特徵都好易比人冒到。再者，身份證有建議使用期限 - 10年，過左10年之後，身份證晶片壞卡情況就會日趨常見。所以第二代智能身份證將會喺2018年推出（換相嘅機會到啦😹）。
有興趣知多D嘅朋友，可以睇下以兩個網址：
http://hk.on.cc/hk/bkn/cnt/news/20170527/bkn-20170527001556648-0527_00822_001.html

http://ezone.ulifestyle.com.hk/article/1823879/%E6%96%B0%E4%B8%80%E4%BB%A3%E6%99%BA%E8%83%BD%E8%BA%AB%E4%BB%BD%E8%AD%89%E5%BF%85%E7%9F%A5%207%20%E4%BB%B6%E4%BA%8B%EF%BC%81%E6%98%8E%E5%B9%B4%205%20%E6%9C%88%E8%B5%B7%E6%8F%9B%E8%AD%89%E5%BD%B1%E6%96%B0%E7%9B%B8


下一次再寫下其他野啦（如果有時間嘅話😪）